သုံးရာသီ ပုရစ် (the Voice News ဆောင်းပါး)
ဆူညံလှသည့် အော်သံများကြောင့် (ရဂုံ) တောစပ်အလား ထင်မှတ်မှားနိုင်သည်။ ထိုဆူဆူညံညံ အသံများက အလျား ရှစ်ပေ၊အနံ လေးပေကန်ငယ်လေးအတွင်းမှ ထွက်ပေါ်နေခြင်းဖြစ်သည်။
ထိုကန်ထဲတွင် ဟိုသည်ပြေးလွှားနေသည့် Insect (အင်းဆက်အုပ်စုဝင်) မည်းမည်း ပိုးကောင်ငယ်များ ဖြစ်သည့် ပုရစ်များပင်။
ယင်းနေရာမှာ တွံတေးမြို့နယ် ရန်ကြီးအောင်ရပ်ကွက်တွင်ရှိ ဦးမျိုးမြင့်ဗိုလ်၏ ပုရစ်မွေးမြူရေးခြံ ဖြစ်သည်။ အင်းဆက်အနွယ်ဝင် ပုရစ်ကို စီးပွားဖြစ်မွေးမြူရန် အချိန် ၂ နှစ်နီးပါး ကြိုးစားခဲ့ရပြီး ယခုအခါ ပုရစ်ကောင်ရေ သောင်းနှင့်ချီစမ်းသပ်မွေးမြူနိုင်ခဲ့ပြီ ဖြစ်သည်။
“သိထားတာ တော်တော်ကြာနေပြီ။ လွန်ခဲ့တဲ့ ၂ နှစ်လောက်ကတည်းက YouTube ကြည့်ရင်းနဲ့ပေါ့။ ထိုင်းမှာ ပုရစ်တွေ မွေးနေတာတွေ့တယ်။ ခက်တာက မျိုးမရဘူး”ဟု ပုရစ်စမ်းသပ်မွေးမြူသူ ဦးမျိုးမြင့်ဗိုလ်က ဆိုသည်။
ပြည်တွင်းမျိုးရင်းဖြစ်သည့် အညိုရင့်ရောင် ပုရစ်ကြီးမျိုးကို မွေးမြူရန် အကြိမ်ကြိမ်ကြိုးစားခဲ့သော်လည်း အောင်မြင်ခြင်း မရှိခဲ့ပေ။ အကြောင်းက ပုရစ်မျိုးဥ ရရှိရန် ခက်ခဲခြင်း၊ အရှင်ဖမ်းမိသော ပုရစ်များက မွေးမြူ၍ မရဘဲ သေဆုံးသွားသည့်အတွက်ကြောင့်ပင်။
ဦးမျိုးမြင့်ဗိုလ်၏ စီးပွားဖြစ် ပုရစ်မွေးမြူရေး အိပ်မက်သည် မှေးမှိန်မသွား။ IT ခေတ်၏ နည်းပညာအကူအညီဖြင့် နေ့စဉ် အင်တာနက်စာမျက်နှာများတွင် ရှာပုံတော်ဖွင့်နေခဲ့သည်။
၂ နှစ်ခန့် ရှာပုံတော်ဖွင့်ပြီးနောက် ပြီးခဲ့သည့် ဧပြီလတွင်ထိုင်းနိုင်ငံရှိ ပုရစ်မွေးမြူသူများနှင့် Facebook မှတစ်ဆင့် အဆက်အသွယ်ရရှိခဲ့ပြီး ထိုင်းနိုင်ငံတွင် မွေးမြူနေသည့် အမေရိကန်မျိုး ပုရစ်ဥများကို နယ်စပ်မှတစ်ဆင့် ဝယ်ယူနိုင်ခဲ့သည်။
တိရစ္ဆာန်မွေးမြူရေးလုပ်ငန်းဟု ဆိုသည်နှင့် မြန်မာနိုင်ငံတွင် တွေးမြင်မိသည်က ကြက်၊ ဝက်နှင့် နွားတို့ပင်။ ပြည်တွင်းတွင် ပုရစ်ကို မွေးမြူရေးလုပ်မည်ဆိုပါက အံ့ဩသွားကြမည်သာ။ ပုရစ်များသည် သဘာဝအလျောက် ထွက်ရှိသည့် ရာသီစာ ဖြစ်သည့်အတွက်ကြောင့်ပင်။
သို့သော် ကမ္ဘာရွာကြီးတွင်တော့ ပုရစ်မွေးမြူခြင်းမှာ အထူးအဆန်း မဟုတ်။ ဝါးပိုး၊ ပုရစ်၊ ဘီလား၊ နှံကောင်နှင့် သစ်ပိုး စသည့် အင်းဆက်များကို စီးပွားဖြစ်မွေးမြူနေကြသည်။ ပြည်တွင်း၌ လူကြိုက်များသည့် ရာသီစာဖြစ်သည့် ပုရစ်သည် အိမ်နီးချင်း ထိုင်း၊ ကမ္ဘောဒီးယားနှင့် လာအိုတို့တွင် စီးပွားဖြစ်မွေးမြူကြသည်။
ထိုင်းနိုင်ငံတွင် ပုရစ်မွေးမြူရေးကို ၁၉၉၈ ခုနှစ်ခန့်ကတည်းက စတင်ခဲ့ပြီး ထိုင်းနိုင်ငံတွင် ပုရစ်မွေးမြူသူ နှစ်သောင်းကျော်ရှိကာ တစ်နှစ်လျှင် ပုရစ်တန်ချိန် ၇၅၀၀ ခန့်ထုတ်လုပ်နေကြောင်း ကုလသမဂ္ဂ စားနပ်ရိက္ခာနှင့် စိုက်ပျိုးရေးအဖွဲ့ (FAO) ၏ ပုရစ်စစ်တမ်းတွင် ဖော်ပြသည်။
အိမ်နီးချင်းနိုင်ငံများတွင် စီးပွားဖြစ်မွေးမြူနေသော်လည်း ပြည်တွင်းတွင် အစပြုရသည့် အခြေအနေသာ ရှိသေးသည်။ အဖွဲ့ဝင် တစ်ရာ့သုံးဆယ်ကျော် ပါဝင်သည့် ပုရစ်မွေးမြူကြသူများ Facebook Page နှင့် စမ်းသပ်မွေးမြူသူအချို့မြေစမ်း ခရမ်းပျိုးနေဆဲဖြစ်သည်။
နိုင်ငံတကာရှိ ပုရစ်ခြံ၏ အဓိကထုတ်ကုန်မှာ ပုရစ်အကောင်ဖြစ်ပြီး ပုရစ်ချေး(သဘာဝမြေဩဇာ)၊ ပုရစ်ဥဗန်း (ပုရစ်မျိုး) တို့ကိုလည်း ထုတ်လုပ်သည်။
ပုရစ် ၁၀၀ ဂရမ်တွင် ပရိုတင်းဓာတ်(အသားဓာတ်) ပါဝင်မှု ၆၉ ရာခိုင်နှုန်းအထိ ပါဝင်ပြီး အခြားကြက်သား၊ ဝတ်သားနှင့် အမဲသားတို့ထက် ပရိုတင်းဓာတ် ထက်ဝက်ကျော် ပိုမိုရရှိသည့် အစားအစာဖြစ်ကြောင်း ၂၀၁၃ခုနှစ်တွင် ထုတ်ပြန်သည့် FAO ၏ ပုရစ်စစ်တမ်းတွင် ဖော်ပြသည်။
နိုင်ငံတကာတွင် ပုရစ်ကို အကောင်လိုက်ကြော်စားခြင်းအပြင် ပုရစ်မှုန့်(ပုရစ်ပေါင်ဒါ) အဖြစ်ထုတ်လုပ်၍ ဘီစကစ်၊ ကွတ်ကီးများတွင် ထည့်သွင်းထုတ်လုပ်ခြင်း၊ ပုရစ်မှုန့်ကို အစားအသောက်များတွင် ဖြူးစားခြင်းများရှိကြကာ ပရိုတင်းဓာတ်ကြွယ်ဝပြီး အရသာရှိသည့်အတွက် ပုရစ်သည် ဈေးကွက်ဝင် အင်းဆက်ဖြစ်လာသည်။
ပုရစ်ကို နည်းလမ်းလေးသွယ်ဖြင့် မွေးမြူနိုင်သည်။ ကွန်ကရစ်ဝိုင်း (ကွန်ကရစ်ရေစည်)၊ အလျား ရှစ်ပေ အနံ လေးပေ အမြင့် နှစ်ပေ ပုံစံတည်ဆောက်ထားသည့် ကွန်ကရစ်ကန်များဖြင့် မွေးနိုင်သည်။ ကွန်ကရစ်ကန်က နေရာကျဉ်းကျဉ်းတွင် အကောင်ရေများများ မွေးနိုင်သည့်အတွက် စီးပွားဖြစ်မွေးမြူသူများ အကြိုက်ဖြစ်သည်။
ကွန်ကရစ်ကန်အစား စရိတ်ချွေတာသည့်အနေနှင့် အထပ်သားနှင့် မျက်နှာကြက်ကျောက်ပြားတို့ဖြင့် ကန်ပြုလုပ်၍ မွေးမြူနိုင်သည်။ နေရာမရှိသူများက ပလတ်စတစ်အံဆွဲကန်ဖြင့် မွေးနိုင်သည်။ ထိုကန်ထဲတွင် ပုရစ်များခိုအောင်းနိုင်ရန် ကြက်ဥထည့်သည့် စက္ကူကပ်များကိုစီထည့်၍ မွေးမြူကြခြင်းဖြစ်သည်။
ပုရစ်၏ သဘာဝအရ ပရိုတင်းဓာတ် ပေါကြွယ်ဝသည့် အစားအစာဖြစ်သည့်အတွက် အစာကျွေးရာတွင်လည်း ပရိုတင်းဓာတ်ပါဝင်မှုများသည့် အစားအစာများကိုကျွေးရန်လိုအပ်ကြောင်း မွေးမြူသူများထံမှ သိရသည်။
ပြည်တွင်း ပုရစ်ဈေးကွက်သည် ရာသီပေါ်ပုရစ်ကို ကြော်၍ ရောင်းချခြင်းတစ်ခုသာရှိသော်လည်း စားသုံးသူများသည့် ဈေးကွက်ကြီးတစ်ခု ဖြစ်သည်။
အွန်လိုင်းရှော့ခ်ပင်းများ ခေတ်စားခြင်းနှင့်အတူ ပုရစ်ကြော်သည်လည်း အဆင့်မြင့်လာသည်။ ယခင်က ပုရစ်ကို အကောင်လိုက် ရိုးရိုးကြော်ရောင်းရာမှ ခြေထောက်၊ အတောင်သန့်စင်ပြီး ကြိုက်နှစ်သက်ရာ အချို၊ အစပ် ကြက်သွန်ဖြူ၊ မြေပဲနှင့် ဟင်းခတ်အမွှေးအကြိုင်များ ထည့်ကြော်လာကြသည်။
ဈေးနှုန်းအားဖြင့်လည်း ပုရစ် အကောင်တစ်ရာ၊ ငါးဆယ် ဆိုလျှင် ကျပ်တစ်သောင်းကျော်သည်အထိ ဈေးရှိသည်။ ပုရစ် ရာသီအလိုက်အကောင်အကြီးအသေးနှင့် ဈေးနှုန်း မပြောင်းလဲဘဲရှိနေပြီး မိုးနှင့် ဆောင်းတွင်သာ ရရှိသည့် အစားအစာဖြစ်သည့်အတွက် ရှားပါးစာလည်းဖြစ်သည်။
ပုရစ်ရာသီမကုန်မီ ပုရစ်ကြော် မဖြစ်မနေစားမည်ဆိုသည့် သာကေတမြို့နယ်တွင် နေထိုင်သည့် မယွန်းစန္ဒီကမူ ပုရစ်ကြော်ရောင်းချသူများသော်လည်း အရသာ၊ ဈေးနှုန်းကွာခြားချက်များ ရှိသည့်အတွက် သေချာ စိစစ်ရွေးဝယ်ရကြောင်း ရှင်းပြသည်။
“အွန်လိုင်းက ဝယ်စားတယ် ပုရစ်ကို။ အပြင်ကဆို မလတ်တာများတယ် အရသာမကောင်းဘူး။ အိမ်မှာ ကြော်ပြီး ပြန်ရောင်းတာ မွှေးတယ်။ အရသာ ကောင်းတယ်။ ဈေးလည်း ကြီးတယ်လေ” ဟု ၎င်းက ပြောဆိုသည်။
တန်ဖိုးမြင့်ပုရစ်ကြော်များ ခေတ်စားလာသည့်တိုင် သမားရိုးကျ ပုရစ်အကောင်လိုက်ကြော် ရောင်းချသည့် လမ်းဘေးဈေးသည်များကိုလည်း ရန်ကုန်မြို့လယ်တွင် နေရာမရွေးတွေ့နိုင်သည်။
ပုရစ်သည် မြန်မာ့အကြိုက် ရာသီစာဖြစ်သည်နှင့်အညီ ဈေးကွက်လိုအပ်ချက်ကြီးမားသည့်အလျောက် မိရိုးဖလာ ဖမ်းဆီးခြင်းများအပြင် ပုရစ်လာ မီးဖြင့်ဖမ်းခြင်း၊ အဆိပ်ချဖမ်းခြင်းများ ရှိလာသည်။
မည်သည့်နည်းဖြင့် ဖမ်းသည်ကို တိတိပပ မသိသော်လည်း ပုရစ်ကြိုက်သူများက ရာသီပေါ်စာ ပုရစ်ကို ခုံမင်စွာ စားသောက်နေကြဆဲ။
ရန်ကုန်မြို့လယ် ပန်းဆိုးတန်းလမ်း ခုံးကျော်တံတားအောက်တွင် ပုရစ်ကြော်ရောင်းချနေသည့် အသက် ၅၀ အရွယ် ဒေါ်ကုလားမ၏ တစ်ရက် ပုရစ်ကြော်ရောင်းရငွေမှာ ကျပ်သုံးသောင်းဝန်းကျင် ရှိသည်။
“ဆေးချဖမ်းတာတွေတော့ မဟုတ်ပါဘူးနော်” ဟု ပုရစ်ကြော်လာဝယ်သည့် အမျိုးသမီးတစ်ဦးက မေးခွန်းထုတ်ပြီး ပုရစ်များကို ရွေးနေသည်။
ဒေါ်ကုလားမသည် ရာသီပေါ်အစားအသောက်ဖြစ်သော ပုရစ်ကြော်ကို ရောင်းချသည့် သက်တမ်းငါးနှစ်ကျော်ရှိသူဖြစ်ပြီး ၎င်း ရောင်းချသည့် ပုရစ်များက ဆေးဖြင့်ဖမ်းခြင်း မဟုတ်ဟုလည်း ပြောဆိုသည်။
“ပုရစ်ရောင်းတဲ့သူတွေက ပိုတောင်စားဖြစ်သေးတယ်။ ဆေးနဲ့ ဆိုတာ မဟုတ်ပါဘူး အစ်မရယ်”ဟု ဝယ်သူများ ရွေးသည့်အတွက် ပြန့်ကျဲနေသည့် ပုရစ်ကြော်ဗန်းကို ပြန်စီရင် ဒေါ်ကုလားမက ဆိုသည်။
တစ်ထောင်ဖိုး ၁၂ ကောင်ဖြင့် ရောင်းသော ပုရစ်ကြော်ကို ၁၃ ကောင်ဖြင့် ရောင်းသူဝယ်သူ ဈေးတည့်သွားသည်။
အဆိပ်ချ(ဆေးချ) ဖမ်းခြင်းမဟုတ်ဟု ဆိုသော်လည်း ၎င်းရောင်းချသည့် ပုရစ်များကို ကိုယ်တိုင်ကြော်ခြင်း မဟုတ်။ ဝေါမြို့ပုရစ်ဒိုင်က ကြော်ပြီးသားကို ခေါက်ပြန်ကြေးယူ၍ ရောင်းချသူဖြစ်သည်။
ရန်ကုန်မြို့လယ်တွင် ရောင်းချနေသာ ပုရစ်ကြော်သည် အများစုက ရန်ကုန်ဘူတာကြီး ဝန်ထမ်းအိမ်ရာဝင်းတွင် နေထိုင်သူအများစုဖြစ်ပြီး ပုရစ်ရာသီရောက်သည်နှင့် ပုရစ်လှိုင်လှိုင်ထွက်ရာ ပဲခူး၊ မန္တလေးတို့မှ အသင့်ကြော်ပြီးသား ပုရစ်များကို ရန်ကုန်ဘူတာကြီးအရောက် ခေါက်ပြန်ကြေးယူ၍ ရောင်းချခြင်းဖြစ်ကြောင်း အနော်ရထာလမ်းနှင့် ဆူးလေဘုရားလမ်းထောင့်တွင် ပုရစ်ကြော်ရောင်းချသူ ဦးကျော်သန်းက ဆိုသည်။
ဦးကျော်သန်းသည် ရန်ကုန်ဘူတာကြီး ဝန်ထမ်းအိမ်ရာဝင်းတွင် နေထိုင်သူဖြစ်ပြီး ရာသီပေါ် ပုရစ်ကြော်ရောင်းချခြင်းကို ရှစ်နှစ်နီးပါး လုပ်ကိုင်သူဖြစ်သည်။
“မွေးမြူရေးလားဘာလားတော့ မသိဘူး။ ဒီကပဲ(ရန်ကုန်ဘူတာကြီး) ယူရောင်းတာ။ ဝယ်ရင် ဈေး ၆၀(ကျပ်) ။ ဈေးကျသွားတာ။ အရင်က ၁၀၀ လောက် ရှိတယ်။ မန္တလေးဘက်က လာတာ။ ဖမ်းတာ မမြင်ဖူးဘူး။ မသိဘူး။ ရောင်းသာ ရောင်းနေတာ”ဟု ဦးကျော်သန်းက ရှင်းပြသည်။
ပုရစ်များကို ကုက္ကိုသီး အမှည့်တွင် ပိုးသတ်ဆေးထည့်၍ ဖမ်းခြင်းမျိုး ကြားဖူးပြီး ထိုနည်းသုံး၍ ဖမ်းခြင်း မဖမ်းခြင်းကိုမူ တိတိပပ ပြောပြနိုင်ခြင်းမရှိကြောင်း ဗဟန်းမြို့နယ်ရှိ သက်မေ ရန်ကုန်ပုရစ်ကြော် လုပ်ငန်းလုပ်ကိုင်သူ မမေကပြောဆိုသည်။
ပုရစ်အစိမ်းဈေးကွက်တွင် မလတ်ဆတ်ခြင်းကြောင့် အရောင်မလှတော့သည့် ပုရစ်ကို ချွတ်ဆေးသုံး၍ ဖြူအောင်လုပ်ခြင်း၊ ကျောက်ချဉ်စိမ်ခြင်းများ ရှိသည့်အတွက် သေချာစိစစ် ရွေးဝယ်ရကြောင်း ၎င်းက ဆက်လက်ပြောဆိုသည်။
ပုရစ်များသည် ပိုးသတ်ဆေးကြောက်သည့် အင်းဆက်ဖြစ်သည့်အလျောက် ပိုးသတ်ဆေးချ ဖမ်းခြင်းထက် ပုရစ်ကျသည့် ရာသီတွင် မီးရောင်ဖြင့် ပိတ်ကားများ ထောင်ဖမ်းခြင်းဖြစ်ကြောင်း မမေက ရှင်းပြသည်။
ပုရစ်ကျသည့် ရာသီတွင် တောင်ပုံရာပုံပုရစ်များ ဖမ်းမိသော်လည်း ပုရစ်အကောင် တစ်သိန်းတွင် အွန်လိုင်းတွင် ရောင်းချရန် တန်းဝင်သည့် ပုရစ် အကောင်တစ်သောင်းခန့်သာ ရရှိသဖြင့် လုံလောက်မှု မရှိဘဲ ပုရစ်ကြော် ငါးဘူးမှာသူကို နှစ်ဘူး၊ သုံးဘူးခန့်သာ ရောင်းချနိုင်ကြောင်း ၎င်းက ညည်းညူသည်။
ထို့သို့ ဝယ်လိုအားများသည့် ရာသီစာပုရစ်ဈေးကွက်သို့ ဦးမျိုးမြင့်ဗိုလ် လုပ်ကိုင်နေကဲ့သို့မွေးမြူရေး ပုရစ်များက နေရာ ယူနိုင်မည်လော။
ထိုင်းနိုင်ငံက မှာယူထားသည့် ပုရစ်မျိုးဥများသည် ခုနစ်ရက်အတွင်း အကောင်ပေါက်ပြီး ၄၂ ရက်သားတွင် မျိုးဥများ ပြန်ချသဖြင့် ဦးမျိုးမြင့်ဗိုလ်၏ ပုရစ်မွေးမြူရေးအိပ်မက် အကောင်အထည်ပေါ်လာပြီ ဖြစ်သည်။
သို့သော်လည်း ထိုင်းနိုင်ငံက ပုရစ်မျိုးသည် ပြည်တွင်ဈေးကွက်နှင့် အံမဝင်ချေ။
ထိုင်းပုရစ်သည် အကောင်သေးငယ်ပြီး အကြီးဆုံးမှာ မြန်မာနိုင်ငံက အလတ်တန်းစား အဆင့်သာ ဖြစ်နေကြောင်း၊ မြန်မာနိုင်ငံက ပုရစ်စားသုံးသူများမှာ အကောင်ကြီးများကို ကြိုက်နှစ်သက်သဖြင့် ဈေးကွက်ထိုးဖောက်ရန် ခက်ခဲနေသည်ဟု ၎င်းက ပြောဆိုသည်။
ဈေးကွက်ရှာဖွေနေဆဲ ဖြစ်သော်လည်း ပုရစ်အကောင်လိုက် ရောင်းချခြင်းအပြင် ပုရစ်မှုန့်(ပုရစ်ပေါင်ဒါ) ထုတ်လုပ်ရန်အထိ ရည်ရွယ်ထားကြောင်း ၎င်းက ဆိုသည်။
ပုရစ်မွေးမြူရေး စင်မြင့်ကို တည်ဆောက်ပြီး ပုရစ်မွေးမြူရေးနှင့်အတူ ပုရစ်ဈေးကွက်အတွင်း ဝင်ရောက် ရန်ပြင်နေသည့် ဦးမျိုးမြင့်ဗိုလ်၏ ရည်မှန်းချက်ကို အောက်ပါအတိုင်း ပြောဆိုသည်။
“ပွင့်လင်းရာသီရောက်ရင်တော့ စီပွားဖြစ်လုပ်မယ်”
---
the Voice News ဆောင်းပါး
No comments:
Post a Comment